ምፍሕማሕ ሞያሌ ቀጺሉ፡ ብዙሕ ኣባይትን ንብረትን ተቓጺሉ

እቲ ኣብ ዶብ ኦሮምያን ክልል ሶማሌን ኣብ እትርከብ ከተማ ሞያሌ ዝተወልዐ ግጭት ሎሚ ዓርቢ እውን ቀጺሉ ኣሎ። ነበርቲ ከም ዝገለጽዎ፣ ካብ ዝሓለፈ ሰንበት ብሰንኪ ኣጠቃቅማ ባንዴራ ዝተለዓለ ግጭት፣ ካብ ሓሙስ ንግሆ ጀሚሩ ናብ ከቢድ ናይ ተኩሲ ልውውጥ ተሰጋጊሩ። ኣብታ ከተማ ብዙሓት ኣባይቲ፣ ድኳናት፣ ሆቴላትን ትካላት ንግድን ተቓጺሎም ኣለዉ።

ቀይሕ መስቀል ኬንያ ከም ዝሓበሮ፣ ካብቲ ግጭት ዝሃደሙ ብኣማኢት ዝቑጸሩ ነበርቲ፣ መብዛሕትኦም ደቂ ኣንስትዮን ህጻናትን ናብ ዶብ ኬንያ ከም ዝሰገሩን ደገፍ ይግበረሎም ከም ዘሎን ገሊጹ። ነበርቲ ከተማቲ ከቢድ ኣጽዋር ከም ዝጥቀሙሉ ዝገልጹ ዘለዉ ኮይኖም፣ ክሳብ ሕጂ ብፌዴራል ይኹን ብክልል መንግስታት ዝተዋህበ ወግዓዊ መግለጺ የለን።