ግጭት ኣብ ሞያሌ፡ ልዕሊ 40 ሽሕ ሰባት ናብ ኬንያ ተሰዲዶም

ኣብ ከተማ ሞያሌ ዝተወለዐ ናይ ሰሙን ግጭት ልዕሊ 40 ሽሕ ነበርቲ ናብ ኬንያ ንኽስደዱ ገይሩ እዩ። ቀይ መስቀል ኬንያ ከም ዝሓበሮ፡ ነበርቲ ካብቲ ግጭት ንኽድሕኑ ናብ ድንበር ኬንያ ተሰዲዶም ኣለዉ። ነበርቲ እታ ከተማ፡ እቲ ግጭት ኣብ ዝተወለዐሉ እዋን መንግስቲ ፌዴራል ኮነ ናይ ክልል መንግስታት ሓይሊ ጸጥታ ከይሰርዑ ምጽንሖም ንቢቢሲ ገሊጾም ኣለዉ።

እቲ ግጭት ዝጀመረ ድሕሪ እቲ ኣብ ከተማ ባንዲራ ክልል ሶማሌ ምሰቀሉ ዝተፈጥረ ምስሕሓብ ምዃኑ ነበርትን ኣመሓደርቲ ከተማን ይገልጹ። ነበርቲ ብዝተወደበ ሓይሊ ይጥቃዕቲ ከም ዘለዉን ከቢድ ኣጽዋር ከም ዝተተኮሰን ብምግላጽ፡ መንግስቲ ህጹጽ ሓገዝ ክገብር ጸዊዖም። እቲ ኣብ መንጎ ዝተፈላለዩ ወገናት ዝካየድ ዘሎ ግጭት ኣብ ህይወትን ንብረትን ሰባት ዓቢ ጉድኣት የውርድ ኣሎ።