ኣብ ምብራቓዊ ትግራይ ዝረአ ወተሃደራዊ ምንቅስቓስ ዳግማይ ውግእ ክጅመር እዩ ዝብል ስግኣት ፈጢሩ

ኣብ ምብራቓዊ ትግራይን ከባቢ ከተማ ውቕሮን ዝረአ ዘሎ ሓደስቲ ወተሃደራዊ ምንቅስቓሳትን ምትእኽኻባትን ዳግማይ ውግእ ክጅመር እዩ ዝብል ሰፊሕ ስግኣት ኣብ ልዕሊ ነበርቲ ፈጢሩ ኣሎ። ካብ ደቡባዊ ኣንፈት ትግራይ ዝተመለሱ ሓይልታት ትግራይ (ብርክት ዝበሉ ኣርሚታት) ናብ ከተማ ውቕሮ ኣትዮም ድሕሪ ምሕዳር፡ ናብ ከባቢታት ዛዕና፡ ፅገረዳ፡ ሰንሰለታዊ ኣኽራናት ገርዓልታ፡ እንዳ ኣበርሃ ኣጽብሃን ኣጽቢ ወንበርታን ዳግም ምትዕርራይ ገይሮም ከምዘለው ነበርቲ ገሊፆም። ብኻልእ ሸነኽ ድማ ሓይሊ ሰራዊት መንግስትን ሓይሊ ሰላም ትግራይን ናብ ከባቢታት ኣጉላዕን ሓይቂ መስሓልን ገፆም ይስጉሙ ከምዘለዉ ተሓቢሩ ኣሎ። እዞም ተፃባእቲ ሓይልታት ኣብ ቀረባ ርሕቀት ተፀጊዖም ከበድቲ ኣፅዋር ዘዋድዱ ዘለዉ ብሙዃኑን ነበርቲ ብዛዕባ ቀፃሊ ኩነታት ዓቢ ሻቕሎት ሓዲርዎም ይርከብ።