ባይቶ መራኸቢ ብዙሓን ኢትዮጵያ ንጋዜጣ ሪፖርተር እገዳ ኣንቢሩ

ባይቶ መራኸቢ ብዙሓን ኢትዮጵያ ጋዜጣ ሪፖርተር (ብኣማርኛን እንግሊዝኛን)ን ዲጂታል መድረኻታቱን ካብ 2 ሕዳር ጀሚሩ ንዘይተወሰነ ግዜ ከምዘገዶ ኣፍሊጡ። እቲ ባይቶ ዝሓለፈ ሓደ ዓመት ኣብ ዝገበሮ ክትትል፡ እቲ ማዕከን ዜና ንሕግን ስነ-ምግባር ሞያን ዝጠሓሰ ተግባራት ፈጺሙ ከምዘሎ ኣረጋጊጹ።

ካብቶም ዝተጠቕሱ ጥሕሰታት ማእከል፡ ምስ ሃገራዊ ረብሓ ዝጻረር ሓበሬታ ምዝርጋሕ፡ ኣብ ፖለቲካዊን ቁጠባዊን ዛዕባታት ህዝቢ ከም ዝጋጮ ምግባር፡ ከምኡውን ኣብ ወፃኢ ኢንቨስትመንት፡ ቱሪዝምን ዲፕሎማስን ኣሉታዊ ፅልዋ ዘለዎም ዘይተረጋገፁ ሓበሬታታት ምዝርጋሕ ይርከብዎም። እቲ ባይቶ ቅድሚ ሕጂ መጠንቀቕታታት ሂቡ ከም ዝነበረን፡ ምንም ምምሕያሽ ስለዘይተራእየ እቲ እገዳ ከም ዝተነበረን ገሊጹ።