ኣብ ዞባ ጉራጌ ንጸገም ጸጥታ ንምፍታሕ ናይ ዕርቂ ጻዕርታት ተጀሚሩ

ኣብ ማእከላይ ክልል ኢትዮጵያ ዞባ ጉራጌ ወረዳ ኣበሽጌ ዝንቀሳቀሱ ዕጡቓት ናብ ሰላማዊ ህይወት ንምምላስ፡ ባህላዊ ሽማግለ ‹‹ጆካ›› ናይ ዕርቂ ስራሕ ከም ዝጀመረ ኣፍሊጡ። እቲ መስርሕ ኣብ ዞባዊ ምምሕዳርን ኮማንድ ፖስትን ዝቐረበ ሕቶ መሰረት ዝገበረ ኮይኑ፡ ምስቶም ኣብ ዱር ዘለዉ ዕጡቓት ብምዝርራብ ኣወንታዊ ምላሽ ከም ዝረኸቡ ኣቦ መንበር እቲ ሽማግለ ገሊጾም። እቲ ዞባ ብሰንኪ ዝፍጸም ዘሎ ቅትለትን ጨውያን ዝሓለፉ ኣዋርሕ ብኮማንድ ፖስት ክመሓደር ጸኒሑ እዩ። ፖለቲከኛ ኣቶ መሓመድ ኣብራር ግና እቲ ጸገም ካብ ጎረቤት ክልላት ዝመጹ ዕጡቓት ዝፈጠርዎ ምዃኑ ይገልጹ። ነዚ ናይ ሰላም መስርሕ ዘተግብር ስነ-ስርዓት ድማ ንጽባሕ ሓሙስ ኣብ ከተማ ወልቂጤ ንምክያድ ምድላዋት ይግበር ኣሎ።