በጉራጌ ዞን የፀጥታ ችግርን ለመፍታት የሽምግልና ጥረት ተጀመረ

በማዕከላዊ ኢትዮጵያ ክልል ጉራጌ ዞን በአበሽጌ ወረዳ የሚንቀሳቀሱ ታጣቂዎችን ወደ ሰላማዊ ህይወት ለመመለስ ባህላዊው ‹‹የጆካ›› ሸንጎ የሽምግልና ስራ መጀመሩን አስታውቋል። የዞኑ መስተዳድር እና ኮማንድ ፖስት ባቀረቡት ጥያቄ መሠረት የተጀመረው ይህ ሂደት፣ በጫካ ከሚገኙ ታጣቂዎች ጋር በመነጋገር በጎ ምላሽ እንዳገኘ የሸንጎው ሰብሳቢ ገልጸዋል። በዞኑ በሚስተዋሉ የግድያ እና የእገታ ወንጀሎች ምክንያት ባለፉት ወራት የፀጥታ ስራው በልዩ እዝ ወይም በኮማንድ ፖስት እየተመራ ይገኛል። አቶ መሀመድ አብራር የተባሉ የፖለቲካ ፓርቲ አመራር ግን ችግሩ ከአጎራባች ክልሎች የሚመጡ ታጣቂዎች የፈጠሩት መሆኑን ይናገራሉ። የሰላም ሂደቱን የሚያጠናቅቅ ሥርዓትም ነገ ሐሙስ በወልቂጤ ከተማ ለማከናወን ዝግጅት ተደርጓል።