ዶ/ር ወንድወሰን አሰፋ ካብ ቂሊንጦ ዞን 6 ናብ ዞን 4 ተሰጋጊሮም

ኣብ ቤት ማእሰርቲ ቂሊንጦ "ዞን 6" ተኣሲሮም ዝነበሩ ዶ/ር ወንድወሰን አሰፋ፡ ኣብ ልዕሊኦም ይወርድ ኣሎ ዝበልዎ ግህሰት መሰል ተቓዊሞም ካብ ምግብን መድሃኒትን ተኣቂቦም ድሕሪ ምጽናሕ፡ ናብ "ዞን 4" ከምዝተሰጋገሩ ጠበቕኦም ሰለሞን ገዛኸኝ ገሊጾም። ምምሕዳር ቤት ማእሰርቲ ቂሊንጦ ንቤት ፍርዲ ኣብ ዝሃቦ ምላሽ፡ እቲ ተኣሳሪ ካብ ዝነበሮ ቦታ ከምዝተሰጋገረ ኣረጋጊጹ ኣሎ። ዶ/ር ወንድወሰን ነቲ ኣድማ ኣቋሪጾም ምግብን መድሃኒትን ከምዝጀመሩ ጠበቕኦም ተዛሪቦም። ብኻልእ ሸነኽ፡ ኣብ ጉዳይ ኣቶ ዮሃንስ ቧያሌውን ጋዜጠኛ ዳዊት በጋሻውን፡ ጽባሕ ሓላፊ ቤት ማእሰርቲ ናብ ቤት ፍርዲ ቀሪቦም መብርሂ ክህቡ ከምዝጽበዩ ተገሊጹ።