መራሒ ኢሕአፓ ኣቶ ኣበበ ኣካሉ ካብ ቤት ማእሰርቲ ተፈቲሖም

መራሒ ኢትዮጵያዊ ህዝባዊ ኣብዮታዊ ሰልፊ (ኢሕኣፓ) ኣቶ ኣበበ ኣካሉ ብዋሕስ ካብ ቤት ማእሰርቲ ተፈቲሖም። ኣቶ ኣበበ ብሽበራ ክሲ ቀሪብሎም ኣብ ቤት ማእሰርቲ ጸኒሖም እዮም። ጠበቕኦም ሰለሞን ገዛኸኝን ፕረዚደንት እቲ ሰልፊ ኣቶ ኣብርሃም ሃይማኖትን ከም ዘረጋገጽዎ፡ እቲ ኣብ ልደታ ላዕለዋይ ቤት ፍርዲ ዝተወሰነን ኣብ ፌዴራል ላዕለዋይ ቤት ፍርዲ ዝጸንዐን 50,000 ብር ዋሕስ ተኸፊሉሎም ሎሚ ምሸት ተፈቲሖም ኣለዉ። እቲ ቤት ፍርዲ ብዕለት 27 መስከረም ውሳነ ዋሕስ እኳ እንተሃበ፡ ክሳብ ሕጂ ብዘይፍታሕ ጸኒሖም እዮም። ይኹን እምበር፡ ምስኦም ኣብ ቤት ማእሰርቲ ዝርከቡ ናይቲ ሰልፊ ሕጋዊ በዓል ሞያ ኣቶ ኣበራ ንጉስን ሓላፊ ርክብ ህዝቢ ኣቶ ይስሃቅ ወልዳይን ክሳብ ሕጂ ኣይተፈትሑን።