ኣብ ዞባ ኮሬ ብዝተኻየደ መጥቃዕቲ ዕጡቓት ንፁሃን ዜጋታት ተቐቲሎም

ኣብ ክልል ደቡብ ኢትዮጵያ፣ ዞባ ኮሬ ወረዳ ጎርካ ኣብ ቀበሌታት ጃሎን ቆሬን ብዝተኻየደ መጥቃዕቲ ዕጡቓት፣ ንፁሃን ሓረስቶትን ወዲ 14 ዓመት ህፃንን ተቐቲሎም። ካልኦት ሰለስተ ሰባት እውን ጉድኣት በፂሕዎም ኣሎ። ምምሕዳር ዞባ ኮሬ እቲ መጥቃዕቲ ካብ ወረዳ ምዕራብ ጉጂ ብዝመፁ ዕጡቓት ከምዝተፈፀመ ብምሕባር ንግብረ-ሽበራውያን ብፅኑዕ ኮኒኑዎ።

ሓላፊ ሰላምን ፀጥታን እቲ ዞባ ኣይተ መልኩ መርሻ እቲ መጥቃዕቲ ከምዝተፈፀመ ኣረጋጊፆም። ነበርቲ እቲ ከባቢ እቲ መጥቃዕቲ ካብ ዝነበሩ ተደጋጋሚ መጥቃዕትታት ከምዘይተፈለየ ብምግላፅ ሓዘኖም ገሊፆም። ምምሕዳር ዞባ ኮሬ፣ ምምሕዳር ምዕራብ ጉጂ ወንጀለኞች ንፍትሒ ከቅርብ ፃውዒት ኣቕሪቡ። ነበርቲ እውን ሰላሞም ክሕልዉን ምስ ሓይልታት ፀጥታ ብምትሕብባር ክሰርሑን ተላቢዮም።