መበል 119 ዓመት በዓል ሰራዊት ምክልኻልን መግለፂ ፊልድ ማርሻል ብርሃኑ ጁላን

ሰራዊት ምክልኻል ሃገር ኢትዮጵያ መበል 119 ዓመት በዓሉ ኣኽቢሩ። ኣብቲ ስነ-ስርዓት ዝተረኸቡ ሹም ስታፍ ሓይሊታት ምክልኻል ፊልድ ማርሻል ብርሃኑ ጁላ፣ ቀይሕ ባሕሪ ንጥቕሚ ኢትዮጵያ ዝሕሎ ተፈጥሮኣዊ ፀጋ ከምዝኾነ ኣስሚሮምሉ። መንግስቲ ካብ ቀይሕ ባሕርን ወሓዚ ኣባይን ዝርከብ ጥቕሚ ንምኽባር ቆራፅ ከምዝኾነ ገሊፆም።

ብኻልእ ወገን፣ ፊልድ ማርሻል ብርሃኑ ህወሓት ኣብ ዝሓለፉ ሸሞንተ ዓመታት ኣርባዕተ ግዘ ውግእ ከፊቱ ከምዝተሰዓረ ኣዘኻኺሮም። ሰራዊት ሃገራዊ ልኡላውነት ብምክልኻል ዓቕሙ ከምዘረጋገፀ ዝገለፁ ሹም ስታፍ፣ ኣብ መቓብር ሰራዊት ምክልኻል መሰጋገሪ መንግስቲ ከምዘይትከል ኣፍሊጦም። ንህወሓት ንሓምሻይ ግዘ ዕድል ከምዘይህቡ ገሊፆም፣ ፖለቲካዊ ድልየት እንተልዩ ብሰላማዊ መገዲ ክወዳደሩ ኣተሓሳሲቦም።