ነበርቲ ኣርባ ምንጭ ብሰንኪ መጥቃዕቲ ዝንጀሮታት ከም ዘለዉ ገሊጾም

ነበርቲ ከተማ ኣርባ ምንጭ ካብ ብሄራዊ ፓርክ ነጭ ሳር ዝመጹ ጉጅለ ዝንጀሮታት ዘውርድዎ ዘለዉ መጥቃዕትን ዕንወትን እናገደደ ከም ዘሎ ገሊጾም። ነበርቲ ቀደም ብምባል ናብ ቤት ፍርዲ ዘቕረብዎ መረረ ተኸቲሉ፣ እቲ ፓርክ መራሕቲ ጉጅለ ዝንጀሮታት ክቕንስ ትእዛዝ ተዋሂቡዎ እኳ እንተነበረ፣ ዝተወስደ ስጉምቲ እኹል ከም ዘይኮነን መጥቃዕቲ ዝንጀሮታት ካብ ቀደም ብዝበኣሰ ከም ዝቕጽልን ይዛረቡ። ብተወሳኺ እቲ ፓርክ ንቤት ፍርዲ ዝሃቦ መረዳእታ ጌጋ ከም ዝነበረን ቤት ፍርዲ ድማ ንፓርክ መጠንቀቕታ ሂቡዎ ከም ዝነበረ ነበርቲ ኣዘኻኺሮም።

ብኻልእ ወገን፣ ኣተሓባባሪ ማሕበረሰባዊ ግልጋሎት ብሄራዊ ፓርክ ነጭ ሳር፣ እቲ ፓርክ ሕጊ ብምኽታል 10 መራሕቲ ጉጅለ ዝንጀሮታት ከም ዘውገደ ገሊጹ። እቲ ኣተሓባባሪ እቲ ጸገም ብዝቕጽል መገዲ ንምፍታሕ፣ ሆቴላት እታ ከተማ ትረፋት መግቢ ኣብ ዝድርብዩሉ እዋን ጥንቃቐ ክገብሩ ጸዊዑ።