ኣብ ስዑዲ ዓረብያ ሓደ ኢትዮጵያዊ ዝቐተሉ ሓሙሽተ ኢትዮጵያውያን ኣብ ትሕቲ ቁፅጽር ውዒሎም

ኣብ ስዑዲ ዓረብያ ከተማ መካ ፖሊስ፡ ሓደ ኢትዮጵያዊ ብጭካነ ዝቐተሉ ሓሙሽተ ኢትዮጵያውያን ኣብ ትሕቲ ቁፅጽር ከምዘውዓለ ኣፍሊጡ። እቶም ተጠርጠርቲ ኣብ ዞባ ራንያ ዝተታሕዙ፡ እቲ ግዳይ ክሃርሙን ክሳቐዩን ዘርኢ ቪድዮ ኣብ ማሕበራዊ ሚድያ ድሕሪ ምዝርጋሑ እዩ። ከም መግለጺ ፖሊስ፡ እቲ ገበን ዝተፈጸመ ኣብ መንጎ እቶም ተጠርጠርትን እቲ ግዳይን ቀደም ዝነበረ ጎነጽ ተበጊሱ እዩ። እቶም ተጠርጠርትን እቲ ግዳይን ሕጊ ዶብ እታ ሃገር ከምዝጠሓሱ ፖሊስ ሓቢሩ። ጉዳዮም ናብ ቤት ፍርዲ ዝተመሓላለፈ ኮይኑ፡ ከቢድ መቕጻዕቲ ክጽበዮም ይኽእል እዩ።