ኣብ ምዕራብ ወለጋ ተጨውዮም ዝነበሩ መራሕቲ ዓበይቲ መካይን ከም ዝተፈትሑ ተገሊጹ

ኣብ ክልል ኦሮሚያ፣ ዞባ ምዕራብ ወለጋ ኣብ ከባቢ ከተማ ግምቢ ብዕጡቓት ተጨውዮም ዝነበሩ መራሕቲ ዓበይቲ መካይን ከም ዝተፈትሑ ማሕበር መራሕቲ ዓበይቲ መካይን ኢትዮጵያ ኣፍሊጡ። እቶም መራሕቲ መካይን ቅድሚ ሓደ ሰሙን ኣብ ዝተፈጸመ መጥቃዕቲ ዝተጨውዩ ክኾኑ ከለዉ፣ ብፃዕሪ ስድራቤታቶም ብሰላም ናብ ገዝኦም ከም ዝተመለሱ እቲ ማሕበር ገሊጹ።

ኣብቲ መጥቃዕቲ 14 መራሕቲ መካይን ተጨውዮም ከም ዝነበሩ ቅድም ኢሉ ተገሊጹ እኳ እንተነበረ፣ እቲ ማሕበር ኣባላቱ ዝኾኑ ትሽዓተ መራሕቲ መካይን ከም ዝተመለሱ ኣረጋጊጹ ኣሎ። እቶም ካልኦት መራሕቲ መካይን እውን ከም ዝተፈትሑ ከም ዝሰምዐ እቲ ማሕበር ጠቒሱ። እቶም መራሕቲ መካይን ብኸመይ ኩነታት ከም ዝተፈትሑ እኳ እንተዘይተፈልጠ፣ ብወገን ማሕበር ግን እቲ ቀንዲ ጉዳይ ሂወቶም ከይሓለፈ ብሰላም ምፍታሖም ምዃኑ ተሓቢሩ።