ኣብ ሶማሊላንድ፣ ፑንትላንድን ክልል ሶማሌን ኣብ ልዕሊ ኢትዮጵያውያን መጥቃዕቲ ይካየድ ከምዘሎ ተገሊጹ

ኣብ ሶማሊላንድ ከተማ ቦረማ፣ ፑንትላንድ ጋርዌ ከምኡውን ጅግጅጋ ዝነብሩ ኢትዮጵያውያን ብሰንኪ ግጭት ሞያለ መጥቃዕትን መፍራራሕን ከምዘጋጠሞም ንቢቢሲ ገሊጾም። ኣብ ቦረማ ጥራይ ልዕሊ 150 ኣባይቲ ከምዝተዘረፈን ከምዝዓነወን፣ ብዙሓት ተወላዶ ኦሮሞ ድማ ካብ ቦታኦም ተመዛቢሎም ኣብ መዕረፊ ነፈርትን ካልኦት ቦታታትን ከምዝተዓቆቡ ነበርቲ ገሊጾም። ኣብ ጋርዌ ዝነብሩ ኢትዮጵያውያን እውን ተመሳሳሊ ዘረፋን መጥቃዕትን ይወርዶም ከምዘሎ ገሊጾም መንግስቲ ቅልጡፍ መፍትሒ ክህቦም ጸዊዖም። ምምሕዳር ኣውዳል ኣብ ቦረማ ኣብ ዝተፈጸመ መጥቃዕቲ ተጠርጠርቲ ኣብ ትሕቲ ቁጽጽር ከምዝወዓሉ ዝገለጸ ክኸውን ከሎ፣ ግዳያት እውን መንግስቲ ኢትዮጵያ ንዜጋታቱ ክከላኸለሎም ጻውዒት ኣቕሪቦም።