Miidhaa godina Wallagga Bahaatti raawwatameen namoonni 20 ol ajjeefaman

Godina Wallagga Bahaa aanaa Kiramuu fi Abee Dongoroo keessatti hidhattootaan haleellaa raawwatameen guyyoota lama keessatti namoonni 20 ol ajjeefamaniiru. Sadaasa 4 bara 2017 aanaa Abee Dongoroo ganda Ciruu, Gaaleessaa fi Gaaree'oor keessatti haleellaa raawwatameen namoonni 8 ajjeefamanii manni jireenyaa gubateera. Ittaansuun, Sadaasa 5 aanaa Kiramuu ganda Gudinaa Jireenyaa keessatti haleellaa raawwatameen namoonni 13 ajjeefamaniiru. Haleellaa kana hunda hordofee jiraattonni qe'ee isaanii irraa buqqa'aniiru. Hidhattoonni haleellaa kana raawwatan kun ji'oota lama dura miseensa 'Amhara Fano National Movement' (AFAN) ta'uu isaanii beeksisuun isaanii ni yaadatama.