ኣብ ምብራቕ ወለጋ ብዝተፈጸመ መጥቃዕቲ ልዕሊ 20 ሰባት ተቐቲሎም

ኣብ ዞባ ምብራቕ ወለጋ ኣብ ዝርከባ ወረዳታት ኪራሙን ኣቤ ዶንጎሮን ብዕጡቓት ጉጅለታት ኣብ ዝተፈጸመ መጥቃዕቲ ኣብ ውሽጢ ክልተ መዓልቲ ልዕሊ 20 ሲቪል ተቐቲሎም። ዕለት 4 ጥቅምቲ ኣብ ወረዳ ኣቤ ዶንጎሮ ኣብ ቀበሌታት ጪሩ፡ ጋሌሳን ጋሬኦርን ብዝተፈጸመ መጥቃዕቲ 8 ሰባት ክቕተሉ ከለዉ፡ ብዙሓት ኣባይቲ ተቓጺሎም ነበርቲ ክመዛበሉ ተገዲዶም። ዝቕጽል መዓልቲ ዕለት 5 ጥቅምቲ ድማ ኣብ ወረዳ ኪራሙ ቀበሌ ጉዲና ጂሬኛ ብዝተፈጸመ መጥቃዕቲ ተወሳኺ 13 ሰባት ህይወቶም ስኢኖም ኣለዉ። እቶም ነዚ መጥቃዕቲ ዝፈጸሙ ዕጡቓት ካብ ክልተ ወርሒ ንላዕሊ ቅድሚ ሕጂ ኣካል ናይ ኣምሓራ ፋኖ ሃገራዊ ምንቅስቓስ (አፋብን) ምዃኖም ከምዝገለጹ ተሓቢሩ።