ጌታቸው ረዳ ኣብ እዋን ውግእ ግብጺ ንህወሓት ሓገዝ ገንዘብ ከምዝገበረት ተዛሪቦም

ፕረዚደንት ግዝያዊ ምምሕዳር ትግራይ ኣቶ ጌታቸው ረዳ፡ ኣብ እዋን ውግእ ትግራይ ግብጺ ንህወሓት ሓገዝ ገንዘብ ትገብር ከምዝነበረት ገሊጾም። ኣቶ ጌታቸው ነዚ ዝገለጹ ኣብ ኮሌጅ ምክልኻል ኢትዮጵያን ኢንስቲትዩት ጉዳያት ወጻእን ኣብ ዝተዳለወ መድረኽ ዘተ ፖሊሲ እዩ። በቲ እዋን ሓላፊ ጉዳያት ወጻኢ ዝነበሩ ኣቶ ጌታቸው፡ ህወሓት ካብ ግብጺ 500 ሚሊዮን ዶላር ሓቲታ ከምዝነበረት ግና 500 ሽሕ ዶላር ጥራይ ከምዝተዋህባ ኣረዲኦም። ብሰንኪ ግድብ ህዳሰ ግብጻውያን ንህወሓት ሙሉእ ብሙሉእ ከምዘይትምእምኑዋ ኣብቲ እዋን ይግምቱ ከምዝነበሩ እውን ኣዘኻኺሮም።