በወላይታ ሶዶ በፖሊስ የተፈፀመውን ድርጊት ተከትሎ ውዝግብ ተፈጠረ

በማህበራዊ ሚዲያ በተሰራጨ ቪዲዮ በወላይታ ሶዶ ከተማ በአንዲት ሴት ላይ በፖሊስ አባላት መሬት ላይ መጎተትና ማዋከብ መፈጸሙ ተገልጿል። የከተማው ነዋሪዎች ድርጊቱ ተቀባይነት የሌለው እና ከሕግ አስከባሪዎች የማይጠበቅ መሆኑን ገልጸው፣ የፖሊስ አባላቱ ይቅርታ ሊጠይቁ እንደሚገባ ጠይቀዋል። የከተማው ፖሊስ አዛዥ ኮማንደር ሀብታሙ አስፋው፣ ክስተቱ ድብደባ አለመሆኑንና ጉዳዩን በመወያየት ግለሰቧ ይቅርታ ጠይቃ ወደ ቤቷ መመለሷን አስታውቀዋል። አዛዡ አክለውም፣ ቪዲዮው በማህበራዊ ሚዲያ የተሰራጨው የከተማ አስተዳደሩ በሕገወጥ ንግድ ላይ የወሰደውን እርምጃ ለማጣጣልና የተሳሳተ መረጃ ለመንዛት እንደሆነ ተናግረዋል። በድርጊቱ የተሳተፉ የፖሊስ አባላት በስራ ሂደታቸው መሰረት ተጠያቂ እንደሚሆኑም አረጋግጠዋል። የከተማው ፍትሕ መምሪያ ጉዳዩን በተመለከተ በአካል ካልሆነ በስተቀር መረጃ እንደማይሰጥ ገልጿል።