በአማራ እና ትግራይ ክልሎች የድሮን ጥቃቶች ሰላማዊ ሰዎችን እየገደሉ እንደሆነ እየተነገረ ነው

በአማራ እና ትግራይ ክልሎች በፌዴራል መንግሥት ተፈጽመዋል የተባሉ የድሮን ጥቃቶች በሲቪሎች ላይ ጉዳት እያደረሱ መሆኑን ህወሓት እና የአማራ ፋኖ ብሔራዊ ንቅናቄ በየፊናቸው አስታወቁ። የዓለም ጤና ድርጅትም በሁለቱም ክልሎች በሚገኙ የተፈናቃዮች መጠለያ ጣቢያዎች ላይ በተፈጸሙ ጥቃቶች ጨቅላ ሕፃናትን ጨምሮ ንፁሃን መገደላቸውን ማረጋገጡን ገልጿል።

ህወሓት የፌዴራል መንግሥት ታጣቂዎችንና ሲቪሎችን ሳይለይ በከባድ የጦር መሣሪያና በድሮን ጥቃት እየገደለ መሆኑን ከሰሰ። የአማራ ፋኖ በበኩሉ በደቡብ ጎንደርና ደቡብ ወሎ አካባቢዎች ተመሳሳይ ጥቃቶች ደርሰው ብዙ ሰዎች እንደተገደሉ ዘርዝሯል። የፌዴራል መንግሥት እና መከላከያ ሠራዊት እስካሁን በጉዳዩ ላይ ምንም ዓይነት ምላሽ አልሰጡም።