በአርሲ ሀገረ ስብከት በሰላማዊ ሰዎች ላይ ጥቃት እየተፈጸመ መሆኑ ተገለጸ

የአርሲ ሀገረ ስብከት ጽሕፈት ቤት በሥሩ በሚገኙ ወረዳዎች በሰላማዊ ሰዎችና በክርስቲያኖች ላይ ተደጋጋሚ ጥቃት እየተፈጸመ መሆኑን አስታወቀ። ከዚህ ቀደም በማርቲ እና በሽርካ ወረዳዎች ከተፈጸሙ ጥቃቶች በተጨማሪ፣ በቅርቡ በሮቤ ወረዳ እንዳቶ ቀበሌ በታጣቂዎች በተከፈተ ተኩስ የሰው ህይወት መጥፋቱ ተገልጿል። የአርሲ እና የሶማሌ ክልል ጅግጅጋ አህጉረ ስብከት ሊቀ ጳጳስ ብፁዕ አቡነ ኤልሳዕ፣ የጸጥታ ችግሩ መባባሱ እንዳሳዘናቸው በመግለጽ፣ መንግሥት ለሕዝቡ ጥበቃ እንዲያደርግና ዘላቂ መፍትሔ እንዲሰጥ ጥሪ አቅርበዋል። የሀገረ ስብከቱ ዋና ሥራ አስኪያጅ በኩረ ትጉሃን በለጠ ኃይለማርያም እንዲሁ ችግሩ በቁርጠኝነት ካልተፈታ ተጨማሪ ጉዳት ሊከተል እንደሚችል አስጠንቅቀዋል።